സ്വന്തം ലേഖകന്‍
ശ്രീപത്മനാഭ സ്വാമി ക്ഷേത്രത്തിലെ നിറപുത്തരി ഉത്സവത്തിന് ഇത്തവണ നിയമസഭാ വളപ്പില്‍ വിളയിച്ച നെല്‍ക്കതിരുകള്‍. നെല്ലിന്‍റെ വിളവെടുപ്പ് സ്പീക്കര്‍ പി. ശ്രീരാമകൃഷ്ണന്‍ ഉദ്ഘാടനം ചെയ്തു. നഗരസഭാ സ്റ്റാന്‍ഡിംഗ് കമ്മിറ്റി ചെയര്‍മാന്‍ വഞ്ചിയൂര്‍ പി. ബാബു നെല്‍ക്കതിരുകള്‍ ഏറ്റുവാങ്ങി.
പൂര്‍ണമായി ജൈവകൃഷി സമ്പ്രദായത്തിലാണ് നിയമസഭാ വളപ്പില്‍ നെല്‍കൃഷി ചെയ്യുന്നതെന്ന് സ്പീക്കര്‍ പറഞ്ഞു. കേരള നിയമസഭ ഹരിത പ്രോട്ടോക്കോള്‍ രണ്ടുവര്‍ഷം മുമ്പ് പ്രഖ്യാപിച്ചിരുന്നു. നിയമനിര്‍മാണ സഭ എന്ന നിലയില്‍ മാത്രമല്ല, നമ്മുടെ ജൈവജീവിതത്തിന്‍റെ ഒരു പ്രദര്‍ശനകേന്ദ്രമായി നിയമസഭാ സമുച്ചയത്തെ മാറ്റുന്നതിനുള്ള ധാരാളം നടപടികളാണ് സ്വീകരിച്ചിട്ടുള്ളത്.
ഒരു തരി മണ്ണ് പോലും വെറുതേയിടാതെയുള്ള ജൈവകൃഷിക്കുള്ള സംവിധാനങ്ങളാണ് ഒരുക്കിയിട്ടുള്ളത്. വളരെ വിപുലമായ തുളസീവനം, മുപ്പതിലധികം ഇനങ്ങളുള്ള കദളീവനം, റോസ് ഗാര്‍ഡന്‍, ജീവനക്കാരുടെ ഹരിതക്ലബ്ബിന്‍റെ നേതൃത്വത്തിലുള്ള വിപുലമായ പ്രവര്‍ത്തനങ്ങള്‍, കൃഷിഭവന്‍റെ ആഭിമുഖ്യത്തിലുള്ള പ്രവര്‍ത്തനങ്ങള്‍ തുടങ്ങിയവയാണ് നടക്കുന്നത്.
കുടപ്പനക്കുന്ന് കൃഷിഭവനില്‍നിന്ന് ലഭിച്ച മണിരത്ന ഇനത്തിലെ വിത്ത് ഉപയോഗിച്ചുള്ള നെല്‍ക്കൃഷിയാണ് നടത്തിയത്. സാധാരണയായി പുത്തരിക്കണ്ടത്തുനിന്നുള്ള നെല്ലാണ് ഉപയോഗിക്കുന്നതെങ്കിലും പൂര്‍ണ വളര്‍ച്ചയെത്തിയ നെല്ല് ഇവിടെ നിന്ന് ലഭിച്ചതിനാലാണ് ഉപയോഗിച്ചതെന്നും സ്പീക്കര്‍ പറഞ്ഞു. ഡെപ്യൂട്ടി സ്പീക്കര്‍ വി. ശശി, നിയമസഭാ സെക്രട്ടറി എസ്.വി. ഉണ്ണികൃഷ്ണന്‍ നായര്‍, മറ്റ് ഉദ്യോഗസ്ഥര്‍ തുടങ്ങിയവര്‍ സംബന്ധിച്ചു.
