സ്വന്തം ലേഖകന്‍
ആപ്പിള്‍ അവതരിപ്പിച്ച പുതിയ ഐഫോണ്‍ 11, ഐഫോണ്‍ 11 പ്രോ, ഐഫോണ്‍ 11 പ്രോ മാക്സ് മോഡലുകളുടെ പ്രീ ബുക്കിംഗ് ഇന്ത്യയില്‍ തുടങ്ങി. ഐഫോണ്‍ 11ന് 64,900 രൂപയാണ് ഇന്ത്യയിലെ വില. ഐഫോണ്‍ 11 പ്രോയ്ക്ക് 99,900 രൂപയും ഐഫോണ്‍ 11 പ്രോ മാക്സിനു 109,900 രൂപയും വിലയാകും. ഐഫോണ്‍ 11 പ്രോ മാക്സ് 512 ജിബി മോഡിന് 1,44,900 രൂപയാണ് ഇന്ത്യയിലെ വില.
ഐഫോണ്‍ ടെന്‍ എസ്, ഐഫോണ്‍ ടെന്‍ എസ് മാക്സ് എന്നിവയുടെ പിന്‍ഗാമികളാണ് ഐഫോണ്‍ 11 പ്രോ, ഐഫോണ്‍ 11 പ്രോ മാക്സ് ഫോണുകള്‍. ഐ ഫോണ്‍ 11 നേക്കാള്‍ ചെറിയ സ്ക്രീന്‍ ആണ് ഐഫോണ്‍ 11 പ്രോയ്ക്ക് . 5.8 ഇഞ്ച് ഡിസ്പ്ലേയാണ് ഇതിനുള്ളത്. അതേസമയം 6.5 ഇഞ്ച് ഡിസ്പ്ലേയാണ് ഐ ഫോണ്‍ 11 പ്രോ മാക്സിന്. ഐഫോണ്‍ ആദ്യമായി ട്രിപ്പിള്‍ റിയര്‍ ക്യാമറ അവതരിപ്പിക്കുന്നത് ഈ ഫോണുകളിലാണ്. 12 എംപി ടെലിഫോട്ടോ, 12 എംപി അള്‍ട്രാ വൈഡ്, 12 എംപി വൈഡ് ആംഗിള്‍ സെന്‍സറുകളാണ് ഇതില്‍ ഉള്‍പ്പെടുന്നത്.
ഏറ്റവും പുതിയ എ 13 ബയോണിക് ചിപ്പില്‍ പ്രവര്‍ത്തിക്കുന്ന ഫോണില്‍ 18 വാട്ട് ചാര്‍ജിങ് സൗകര്യമുണ്ടാവും. ചാര്‍ജറും ഫോണിനൊപ്പം ലഭിക്കും. മിഡ്നൈറ്റ് ഗ്രീന്‍, പ്ലസ് സ്പേസ് ഗ്രേ, സില്‍വര്‍, ഗോള്‍ഡ് നിറങ്ങളില്‍ ഫോണുകള്‍ വിപണിയിലെത്തും.
