സ്വന്തം ലേഖകന്‍
മലിനീകരണ നിയന്ത്രണ ചട്ടപ്രകാരമുള്ള ഇന്ധനം ഭാരത് സ്റ്റേജ് ആറ് (ബി.എസ് 6) അടുത്ത വര്‍ഷം ഏപ്രില്‍ മുതല്‍ രാജ്യത്തെ വലിയ നഗരങ്ങളില്‍ ലഭ്യമാവുമെന്ന് കേന്ദ്ര പരിസ്ഥിതി മന്ത്രി പ്രകാശ് ജാവദേക്കര്‍. ഇതോടെ വാഹന മലിനീകരണം 80% മുതല്‍ 90% വരെ കുറയുമെന്നും അദ്ദേഹം വ്യക്തമാക്കി.
ബിഎസ് 6 ഇന്ധനം തയ്യാറാക്കുന്നതിനായി 60,000 കോടി രൂപ നീക്കിവെച്ചതായി മന്ത്രി അറിയിച്ചു. രാജ്യത്തെ 122 നഗരങ്ങള്‍ക്കായി ദേശീയ ശുദ്ധവായു പദ്ധതി സര്‍ക്കാര്‍ തയ്യാറാക്കിയിട്ടുണ്ടെന്നും അതില്‍ മലിനീകരണം കുറയ്ക്കുന്നതിനുള്ള പദ്ധതികള്‍ ആവിഷ്കരിക്കുമെന്നും അദ്ദേഹം പറഞ്ഞു.
അന്തരീക്ഷ മലിനീകരണം കുറയ്ക്കുന്നതിനായി കര്‍ശനമായ ബി.എസ് 6 എമിഷന്‍ മാനദണ്ഡങ്ങള്‍ക്കനുസൃതമായ ഇന്ധനം ദേശീയ തലസ്ഥാനത്ത് അവതരിപ്പിച്ചതായി ജാവദേക്കര്‍ നേരത്തെ രാജ്യസഭയെ അറിയിച്ചിരുന്നു. അടുത്ത വര്‍ഷം മുതല്‍ രാജ്യത്ത് ബി.എസ് 6 വാഹനങ്ങളുടെ വില്‍പ്പന ആരംഭിക്കുമെന്നും മന്ത്രിസഭയെ അറിയിച്ചിരുന്നു.
