സ്വന്തം ലേഖകന്‍
റിയല്‍മിയുടെ ആദ്യ 5 ജി സ്മാര്‍ട് ഫോണായ റിയല്‍മി എക്സ്50 5 ജി ജനുവരി ഏഴിന് പുറത്തിറങ്ങും. ചൈനയിലാണ് ഫോണ്‍ ആദ്യം അവതരിപ്പിക്കുക. ചൈനീസ് സോഷ്യല്‍ മീഡിയാ വെബ്സൈറ്റായ വീബോയിലൂടെയാണ് റിയല്‍മി ഇക്കാര്യം അറിയിച്ചത്. ക്വാല്‍കോമിന്‍റെ സ്നാപ്ഡ്രാഗണ്‍ 765 ജി പ്രൊസസറാണ് ഫോണിന്‍റെ കരുത്ത്. ഡിസംബറില്‍ നടന്ന ക്വാല്‍കോം സ്നാപ്ഡ്രാഗണ്‍ ടെക് സമ്മിറ്റിലാണ് കമ്പനി ഈ പ്രൊസസര്‍ ആദ്യമായി അവതരിപ്പിച്ചത്.
ഈ പ്രൊസസറില്‍ പുറത്തിറങ്ങുന്ന ആദ്യ ഫോണുകളില്‍ ഒന്നാണ് റിയല്‍മി എക്സ് 50 5 ജി. 192 എംപി ക്യാമറ സെന്‍സര്‍ വരെ പിന്തുണയ്ക്കാനുള്ള ശേഷി എന്നിവയും ഈ പ്രൊസസറിന്‍റെ സവിശേഷതകളാണ്. റിയല്‍മി 5 ജിയുടെ ക്യാമറ സംവിധാനം എങ്ങനെയുള്ളതായിരിക്കുമെന്ന് വ്യക്തമല്ല. വേഗമേറിയ നെറ്റ് വര്‍ക്ക് ലഭ്യമാക്കുന്നതിന് ഡ്യുവല്‍ ചാനല്‍ വൈഫൈ/5ജി സംവിധാനം. ഫോണ്‍ ചൂടാവുന്നത് ചെറുക്കുന്ന ഫൈവ് ഡയമെന്‍ഷണല്‍ ഐസ്-കൂള്‍ഡ് ഹീറ്റ് ഡിസിപേഷന്‍ സംവിധാനം എന്നിവ ഫോണിനുണ്ടാവും.
