സ്വന്തം ലേഖകന്‍
പുഃനചംക്രമണ യോഗ്യമല്ലാത്ത മാലിന്യങ്ങള്‍ കൈമാറുന്നതിനായി ക്ലീന്‍ കേരള കമ്പനിയും ജിയോ സൈക്കിള്‍ ഇന്ത്യയും തമ്മില്‍ കരാര്‍ ഒപ്പിട്ടു. തദ്ദേശ സ്വയംഭരണമന്ത്രി എ.സി.മൊയ്തീന്‍റെ സാന്നിധ്യത്തില്‍ തിരുവനന്തപുരം മാസ്കറ്റ് ഹോട്ടലില്‍ നടന്ന ചടങ്ങില്‍ കരാറുകള്‍ കൈമാറി. കഴിഞ്ഞ മൂന്ന് വര്‍ഷത്തിനിടയില്‍ മാലിന്യ സംസ്കരണമേഖലയില്‍ സംസ്ഥാനം നല്ല രീതിയില്‍ മുന്നോട്ട് പോയതായി മന്ത്രി പറഞ്ഞു. പുനരുപയോഗ, പുനഃചക്രമണ സാധ്യതയില്ലാത്ത മാലിന്യങ്ങള്‍ സംസ്കരിക്കാന്‍ പുതിയ മാര്‍ഗങ്ങള്‍ ആവശ്യമാണെന്നും അദ്ദേഹം പറഞ്ഞു.
ക്ലീന്‍ കേരള കമ്പനി മാനേജിംഗ് ഡയറക്ടര്‍ പി. കേശവന്‍ നായരും ജിയോ സൈക്കിള്‍ ഇന്ത്യ നാഷണല്‍ സെയില്‍സ് ഹെഡ് പ്രകാശ് ബറുവയുമാണ് കരാര്‍ ഒപ്പിട്ടത്. പുനഃചംക്രമണം സാധ്യമല്ലാത്ത ചെരുപ്പ് , റെക്സിന്‍ ,തെര്‍മോക്കോള്‍, ബാഗ് തുടങ്ങിയ പാഴ് വസ്തുക്കള്‍ കരാര്‍ പ്രകാരം കോയമ്പത്തൂര്‍ മധുക്കരയിലെ എ.സി.സി സിമന്‍റ് ഫാക്ടറിയിലേക്ക് കൈമാറും. സിമന്‍റ് നിര്‍മ്മാണത്തിനുള്ള ഇന്ധനമായും അസംസ്കൃത പദാര്‍ത്ഥമായും ഇത്തരം വസ്തുക്കള്‍ ഉപയോഗിക്കും. ചടങ്ങില്‍ നഗരകാര്യ ജോയിന്‍റ് സെക്രട്ടറി ബല്‍രാജ്, നിധി നായര്‍ തുടങ്ങിയവര്‍ സന്നിഹിതരായി.
