സ്വന്തം ലേഖകന്‍
കൊറോണ വൈറസ് വ്യാപനം തടയാനുള്ള മുന്നൊരുക്കങ്ങള്‍ നടത്തുന്ന സാഹചര്യത്തില്‍ ഭക്ഷ്യസാധനങ്ങള്‍ സ്റ്റോക് ചെയ്തിട്ടുണ്ടെന്ന് സംസ്ഥാന ഭക്ഷ്യവകുപ്പ് മന്ത്രി പി. തിലോത്തമന്‍ വ്യക്തമാക്കി.
സംസ്ഥാനത്ത് ഭക്ഷ്യക്ഷാമം ഉണ്ടാകില്ലെന്നും ഭക്ഷ്യ വിതരണത്തില്‍ തടസമുണ്ടാകില്ലെന്നും മന്ത്രി വിശദീകരിച്ചു. ചരക്കു ഗതാഗതം സുഗമമായി നടക്കും. മൂന്ന് മാസത്തേക്കുള്ള ഭക്ഷ്യ സാധനങ്ങള്‍ സ്റ്റോക്കുണ്ട്. റേഷന്‍കടകള്‍ വഴി കൃത്യമായി ഭക്ഷ്യസാധനങ്ങള്‍ വിതരണംചെയ്യും. ആവശ്യമെങ്കില്‍ സമയനിയന്ത്രണം കൊണ്ടുവരുമെന്നും മന്ത്രി പറഞ്ഞു.
അടിയന്തിര സാഹചര്യം പരിഗണിച്ച് സപ്ലൈകോയുടെ കൂടുതല്‍ മൊബൈല്‍ വിതരണ യൂണിറ്റുകള്‍ തുടങ്ങും. സംസ്ഥാനത്തെ വ്യാപാര സ്ഥാപനങ്ങളുടെ സമയക്രമീകരണം ആലോചിക്കുന്നുണ്ട്. മുഖ്യമന്ത്രിയുമായുള്ള ഉന്നതതല യോഗത്തിനു ശേഷം ഇക്കാര്യം തീരുമാനിക്കുമെന്നും മന്ത്രി പറഞ്ഞു.
