ഷാനില് മുഹമ്മദ്
തീയറ്ററില് അഞ്ജലി മേനോന് സംവിധാനം ചെയ്ത 'കൂടെ' എന്ന സിനിമ കണ്ടുകൊണ്ടിരിക്കുമ്പോള് നമ്മുടെ ഉള്ളിലേക്ക് അരിച്ചു കയറുന്ന ഒരുതരം തണുപ്പുണ്ട്. അത് ആ സിനിമ കഴിഞ്ഞാലും തീയറ്റര് വിട്ട് നമ്മുടെ കൂടെ പോരും. അത്ര മനോഹരമായ സ്ഥലത്താണ് ആ സിനിമയുടെ ലൊക്കേഷന്. അങ്ങനെ ആ സ്ഥലത്തെ കുറിച്ച അന്വേഷണത്തിനൊടുവിലാണ് ഈ പേര് ശ്രദ്ധയില്പ്പെടുന്നത്. - ഗ്ലെന്മോര്ഗന്. ഊട്ടിയുടെ തിക്കുംതിരക്കും പൊടിയും ട്രാഫിക് ബ്ലോക്കും എല്ലാം കഴിഞ്ഞു ഗൂഡല്ലൂര്ക്കുള്ള റോഡില് നിന്ന് ഏതാണ്ട് എട്ട് കിലോമീറ്റര് അകത്തേക്ക് മാറിയാണ് ഗ്ലെന്മോര്ഗന് സ്ഥിതി ചെയ്യുന്നത്. ഊട്ടിയില് നിന്ന് ഏകദേശം 35 കിലോമീറ്റര് അകലെ. തിരക്കോ ബഹളമോ വണ്ടികളോ ഒന്നും ഇല്ലാത്ത സ്വച്ഛ സുന്ദരമായ ഗ്രാമം. ചുറ്റും പച്ചപ്പും കോടമഞ്ഞും തണുപ്പ് ആവരണവും മാത്രം.
കണ്ണുകളില് കൂടി മാത്രമല്ല, നമ്മുടെ എല്ലാ അണുവിലും, ശ്വാസത്തില് പോലും നല്ല സുഖകരമായ കുളിര് അകത്തേക് വന്ന് നിറയുന്നു. അത്രമാത്രം സുന്ദരമാണ് ഇവിടത്തെ തണുത്ത കാറ്റും കാലാവസ്ഥയും കാഴ്ചകളും. യൂക്കാലി മണമുള്ള മരങ്ങള് അതിരിടുന്ന, അതിസുന്ദര തടാകക്കരയിലൂടെയുള്ള നടത്തം തരുന്ന ആനന്ദം, ഈ നീലഗിരിക്കുന്നുകള്ക്ക് മാത്രം നല്കാനാവുന്ന ഒന്നാണ്. ഓണക്കാല അവധിയില് കുടുംബത്തിന് മാത്രമായി കുറച്ചു ദിവസം എന്ന ആഗ്രഹത്തോടെ വീട്ടില് നിന്ന് കാര് എടുത്ത് ഇറങ്ങിയതാണ്. ഏറ്റവും പ്രിയപ്പെട്ട കൂട്ടുകാരനും ഫാമിലിയും കൂടെയുണ്ട്. ഊട്ടിയുടെ തിരക്കില് നിന്ന് രക്ഷതേടി ചെന്നത് നീലഗിരി കുന്നുകളില് കൂനൂര് എന്ന സുന്ദരിയുടെ മടിത്തട്ടിലാണ്. സുഖകരമായ താമസവും ഭക്ഷണവും സമ്മാനിച്ച ഒരു നല്ല ദിവസത്തിന് ശേഷം അടുത്ത സ്ഥലത്തേക്കുള്ള യാത്രയാണ് ഗ്ലെന്മോര്ഗനില് എത്തിച്ചത്.
ഗൂഡല്ലൂര് റോഡില് നിന്ന് വലത്തേക്ക് തിരിഞ്ഞു ഓടിത്തുടങ്ങിയപ്പോള് തന്നെ റോഡ് വിജനമായി. റബ്ബറൈസ് ചെയ്ത് ഭംഗിയാക്കിയ റോഡിനിരുവശവും തേയിലതോട്ടങ്ങളും പച്ചപുതച്ച കുന്നിന് പുറങ്ങളും വരി വരിയായി നിരന്ന് നില്ക്കുന്ന വന് മരങ്ങളും അതിരിടുന്നു. അല്പദൂരം കഴഞ്ഞപ്പോള് ' ഗ്ലെന്മോര്ഗന് ടീ എസ്റ്റേറ്റ് ' എന്ന ബോര്ഡ് കണ്ടു. വളരെ പുരാതനമായ ഈ തേയിലതോട്ടങ്ങളില് നിന്നാണ് ആദ്യമായി 'ഗ്രീന് ടി' ഉല്പ്പാദനം തുടങ്ങിയതത്രെ. 500 ഏക്കറോളം ചുറ്റും തേയിലതോട്ടങ്ങളാണ്. വീണ്ടും മുന്നിലേക്കുപോകുമ്പോള് മഴ കൂട്ടുകൂടാനെത്തി. അല്പം കഴിഞ്ഞപ്പോഴേക്കും കാര് തടഞ്ഞു പോലീസുമെത്തി. അവിടം വരെ മാത്രമേ പ്രവേശനമുള്ളൂ, ഫോട്ടോ എടുക്കരുത് എന്നൊക്കെ പറഞ്ഞു ജാഡ കൂട്ടി. സാവധാനം വണ്ടി ഒതുക്കി പുറത്തിറങ്ങി സംസാരിക്കുമ്പോഴാണ് ഇലട്രിസിറ്റി ബോര്ഡ് പ്രോപ്പര്ട്ടി ആണെന്നും സഞ്ചാരികളെ അനുവദിക്കില്ല എന്നുമൊക്കെ അറിയുന്നത്. പൈക്കര ഡാം റിസര്വോയര് ആണ് ഇവിടം. പൈക്കര ഹൈഡ്രോ ഇലക്ട്രിക്ക് പ്രൊജക്റ്റും ഇതിനോട് അനുബന്ധിച്ചാണ്. ഇലക്ട്രിസിറ്റി ബോര്ഡ് അനുമതി ഇല്ലാതെ മുന്നോട്ട് പോകാന് അനുവാദം തരില്ല.
അല്പ നേരത്തെ പരിചയം കാരണം ഒന്ന് പോയി കറങ്ങി ഉടന് തിരിച്ചു വരുവാന് അനുവാദം കിട്ടി. ചാടി കാറില് കയറാന് ഒരുങ്ങിയതും മഴ പോയി ചുറ്റും കോടമഞ്ഞുവന്ന് നിറഞ്ഞു. പിന്നീട് മുന്നോട്ടുള്ള ഓരോ ചുവടും വേറെ ഏതോ ലോകത്തിലൂടെ സഞ്ചരിക്കുന്ന പോലെ തോന്നി. അത്രക്ക് മനോഹരമായ ലൊക്കേഷന്. ഡാം റിസര്വോയറും യൂക്കാലി മരങ്ങളില് നിന്നുള്ള സുഗന്ധവും കോടമഞ്ഞും ഞങ്ങളെ വേറെ ഏതോ ലോകത്തെത്തിച്ചു. കുറെ ദൂരം പോയി തടാകക്കരയില് കുറച്ചു നേരം ചിലവഴിച്ചപ്പോള് മനസും ശരീരവും നന്നേ തണുത്തു.തിരിച്ചു പോരാന് മനസില്ലാമനസോടെ വണ്ടിയെടുത്തു ഗ്ലെന്മോര്ഗന് എന്ന ബോര്ഡ് ഇരിക്കുന്ന സ്ഥലത്തെത്തി കുറച്ചുനേരം കൂടി പുറത്തു ചുറ്റിക്കറങ്ങി. പവര്ഹൗസും പരിസരവും തീര്ത്തും സംരക്ഷണയില് ആണ്. ഏഷ്യയിലെ ഏറ്റവും ഉയരെ സ്ഥിതി ചെയ്യുന്ന പവര്ഹൗസണെന്ന് പോലീസുകാരന് പറഞ്ഞു തന്നു. സമുദ്രനിരപ്പില് നിന്ന് ഏതാണ്ട് 3400 അടി ഉയരെ. പണ്ട് ഇവിടെ പൈക്കര, സിങ്കാര എന്നിവിടങ്ങളില് നിന്ന് പണിക്കാരെ കൊണ്ട് വരാന് റോപ്പ് വേ ഒക്കെ ഉണ്ടായിരുന്നു എന്നും ട്രെക്കിങ്ങിന് അനുമതി ഉണ്ടായിരുന്നു എന്നും വ്യസനത്തോടെ കേട്ടിരുന്നു. അല്ലാതെന്തു ചെയ്യാന്.
നല്ലൊരവധി ദിവസം, നല്ല കുറച്ചു മണിക്കൂറുകള്, ഒരിക്കലും മറക്കാത്ത കുറെ ഏറെ കാഴ്ചകളും സമ്മാനിച്ച് കൊണ്ട് പയ്യെ ഗ്ലെന്മോര്ഗനോട് വിടചൊല്ലാന് സമയമായി. വിജനമായ വഴികള് താണ്ടി വീണ്ടും ഗൂഡല്ലൂര് റോഡില് കയറിയിട്ടും വണ്ടിയിലുള്ള ആരും ഒന്നും സംസാരിക്കുന്നുപോലും ഇല്ല. മനസും ശരീരവും നിറയെ ഗ്ലെന്മോര്ഗന് സമ്മാനിച്ച തണുപ്പ് അത് പോലെ തന്നെ കാത്തു സൂക്ഷിക്കാന് വേണ്ടിയുള്ള ആലോചനയിലായിരിക്കും എല്ലരും. അതോ ഇനി വീണ്ടും എന്ന് കാണുമെന്ന ചിന്തയിലോ...? എന്തായാലും ഒരിക്കലെങ്കിലും കാണേണ്ട, അനുഭവിക്കേണ്ട ഒരു സ്ഥലമാണ് ഗ്ലെന്മോര്ഗന്.
ഇന്ഫോ: ഒരു സാദാ ടൂറിസ്റ്റ് സ്ഥലത്തു പോകുന്ന ലാഘവത്തോടെ ചെന്നെത്തിപ്പെടേണ്ട സ്ഥലമല്ല അവിടം. കടകളും, ഫോണിന് റേഞ്ചും ഇല്ല. ഇലട്രിസിറ്റി ബോര്ഡ് അനുമതി കൂടാതെ പ്രവേശനം അനുവദിക്കില്ല എന്നും ഒരിക്കല് കൂടി ഓര്മിപ്പിക്കുന്നു.
